ગાંધીધામ ટુડે, ન્યૂઝ : રાજકોટ જિલ્લામાંથી એક મહત્વના સમાચાર સામે આવ્યા છે. પોલીસે ચાર પાકિસ્તાની અને છ બાંગ્લાદેશી નાગરિકોને ગેરકાયદેસર રીતે વસવાટ કરતા ઝડપી પાડ્યા છે. હાલમાં, પોલીસ આ તમામની સઘન પૂછપરછ કરી રહી છે અને ત્યારબાદ તેમને તેમના દેશમાં પરત મોકલવાની (ડિપોર્ટેશન) કાર્યવાહી હાથ ધરવામાં આવશે.
પ્રાપ્ત માહિતી અનુસાર, આ પાકિસ્તાની નાગરિકો ઘણાં વર્ષો પહેલાં રાજકોટ આવ્યા હતા અને ત્યારથી તેઓએ પાકિસ્તાન પરત ફરવાનું ટાળ્યું હતું. લગભગ બે દાયકાથી વધુ સમયથી તેઓ ગેરકાયદેસર રીતે રાજકોટમાં રહેતા હતા. ઝડપાયેલા પાકિસ્તાની નાગરિકોમાં એક સગીર પણ હોવાનું જાણવા મળ્યું છે. આ ઉપરાંત, પોલીસે રાજકોટના ભગવતીપરા, મોરબી રોડ, રામનાથપરા અને જંગલેશ્વર જેવા વિસ્તારોમાં તપાસ હાથ ધરી હતી, જ્યાંથી આ છ બાંગ્લાદેશી નાગરિકો મળી આવ્યા હતા. આમ, રાજકોટમાંથી ઝડપાયેલા બાંગ્લાદેશી નાગરિકોની કુલ સંખ્યા ૨૧ થઈ ગઈ છે.
રાજ્યમાં ગેરકાયદેસર ઘૂસણખોરીના બનાવોને ધ્યાનમાં લઈને રાજ્ય સરકારે આ અંગે કડક કાર્યવાહી કરવાનો આદેશ આપ્યો હતો. આ આદેશના પગલે, જિલ્લા પોલીસ તેમજ ગ્રામ્ય એસઓજી (સ્પેશિયલ ઓપરેશન ગ્રુપ) અને એલસીબી (લોકલ ક્રાઈમ બ્રાન્ચ)ની ટીમોએ જુદા જુદા વિસ્તારોમાં ગેરકાયદેસર ઘૂસણખોરી અંગે તપાસ શરૂ કરી હતી. આ તપાસ દરમિયાન, એલસીબીને મળેલી બાતમીના આધારે ટીમે લોધિકા તાલુકામાં તપાસ હાથ ધરી હતી. ત્યાં ચાર પાકિસ્તાની નાગરિકો ગેરકાયદેસર રીતે રહેતા હોવાનું સામે આવતા પોલીસે તેઓને ઝડપી પાડ્યા હતા.
વધુમાં જાણવા મળ્યું છે કે આ પાકિસ્તાની પરિવાર પાસેથી ભારતીય ચૂંટણી કાર્ડ સહિતના દસ્તાવેજો પણ મળી આવ્યા હતા. જો કે, આ દસ્તાવેજો અંગે સઘન પૂછપરછ કરવામાં આવતા તેઓએ પોતે પાકિસ્તાની હોવાનું કબૂલ્યું હતું. તેઓ લગભગ દોઢ દાયકા પહેલાં પાકિસ્તાનથી રાજકોટ આવ્યા હતા અને ત્યારથી તેઓએ પરત ફર્યા નહોતા.
હાલમાં, બાંગ્લાદેશી નાગરિકોની પણ સઘન પૂછપરછ કરવામાં આવી રહી છે. પોલીસને આશા છે કે આ પૂછપરછ દરમિયાન અનેક મહત્વના ખુલાસા થઈ શકે છે. તમામ વિદેશી નાગરિકોની ઓળખ અને વિગતોની ખરાઈ થયા બાદ, તેઓને તેમના સંબંધિત દેશોમાં પરત મોકલવાની (ડિપોર્ટ) કાર્યવાહી શરૂ કરવામાં આવશે.
