ગાંધીધામ ટુડે, ન્યૂઝ : ગુજરાતમાં માર્ગ અકસ્માતોની સંખ્યામાં ચિંતાજનક વધારો જોવા મળી રહ્યો છે, જે સલામત સફરના દાવાઓ સામે સવાલ ઉભા કરે છે. આ વર્ષે માત્ર 105 દિવસમાં જ વાહન અકસ્માતોમાં ઈજા પામનાર લોકોની સંખ્યા 52,343 પર પહોંચી ગઈ છે. એટલે કે, રાજ્યમાં દરરોજ સરેરાશ 498 લોકો અને દર કલાકે સરેરાશ 21 વ્યક્તિઓ માર્ગ અકસ્માતનો ભોગ બની રહી છે.
ઈમરજન્સી સેવા 108 દ્વારા પ્રાપ્ત માહિતી અનુસાર, આ વર્ષે 1 જાન્યુઆરીથી 16 એપ્રિલ સુધીના સમયગાળામાં માર્ગ અકસ્માતોમાં ઈજાના 52,343 કેસ નોંધાયા છે. આ આંકડો ગત વર્ષના સમાન સમયગાળાની સરખામણીમાં લગભગ 10 ટકાનો વધારો દર્શાવે છે. ગત વર્ષે આ સમય દરમિયાન 47,679 લોકોને માર્ગ અકસ્માતોમાં ઈજા પહોંચી હતી, જ્યાં દૈનિક સરેરાશ 454 ઈજાગ્રસ્તોની હતી.
ચિંતાજનક વાત એ છે કે, આ વર્ષે માર્ગ અકસ્માતોમાં સૌથી વધુ ઈજાઓ અમદાવાદ જિલ્લામાં નોંધાઈ છે, જે દર્શાવે છે કે રાજ્યના મોટા શહેરોમાં પણ માર્ગ સલામતીની સ્થિતિ સુધારવાની તાતી જરૂરિયાત છે.
માર્ગ અકસ્માતોની આ વધતી જતી સંખ્યા રાજ્યમાં ટ્રાફિક નિયમોના પાલન અને માર્ગ સલામતી અંગે વધુ કડક પગલાં લેવાની માંગ કરે છે. વાહનચાલકોની બેદરકારી, વધુ પડતી ઝડપ અને ટ્રાફિક નિયમોનું ઉલ્લંઘન જેવા કારણો અકસ્માતોને નોતરી રહ્યા છે, જેના પરિણામે અનેક લોકો ગંભીર ઈજાઓનો ભોગ બની રહ્યા છે. સરકારે આ પરિસ્થિતિને ગંભીરતાથી લઈને અસરકારક પગલાં ભરવાની જરૂર છે, જેથી માર્ગ અકસ્માતોના આ ભયાનક પ્રમાણને નિયંત્રિત કરી શકાય.
