ગાંધીધામ ટુડે, ન્યૂઝ : ગાંધીધામ એ-ડિવિઝન પોલીસે ગળપાદર વિસ્તારમાં એક રહેણાંક મકાન પર દરોડો પાડી, ₹1,92,740/-ની કિંમતનો કુલ 19.274 કિલોગ્રામ ગાંજો ઝડપી પાડ્યો છે. આ કાર્યવાહીમાં ત્રણ આરોપીઓની ધરપકડ કરવામાં આવી છે, જ્યારે ચોથો આરોપી ફરાર છે.
ગુપ્ત માહિતીના આધારે દરોડો
પોલીસને મળેલી ગુપ્ત માહિતીના આધારે આ કાર્યવાહી કરવામાં આવી હતી. બાતમી હતી કે, હરપાલસિંહ અજીતસિંહ જેઠવા (ઉં.વ. 32), જે ગળપાદર, તા. ગાંધીધામ ખાતે પોતાના રહેણાંક મકાનમાં ગેરકાયદેસર રીતે નશીલા પદાર્થો રાખીને વેચાણ કરે છે. આ માહિતી મળતાં, NDPS એક્ટની કલમ 8(C), 20(b), અને 29 મુજબ ગુનો નોંધીને દરોડાની કાર્યવાહી હાથ ધરવામાં આવી હતી.
ઝડપાયેલા અને ફરાર આરોપીઓ
પોલીસે હરપાલસિંહ અજીતસિંહ જેઠવા (ઉં.વ. 32), રહે. પ્લોટ નં. બી/159, સહારાનગર, ગળપાદર, તા. ગાંધીધામ; જોગેન્દ્રસિંહ લક્ષ્મણસિંહ વાઘેલા (ઉં.વ. 29), રહે. મ.નં. 62, વર્ધમાનનગર, ગળપાદર, તા. ગાંધીધામ; અને મનોજ ભાગવત શર્મા (ઉં.વ. 22), રહે. પી.એસ.એલ. કાર્ગો ઝૂંપડા, ગાંધીધામને ઝડપી પાડ્યા હતા. જ્યારે અનુ ઉડીઓ નામનો આરોપી ફરાર થઈ ગયો હતો.
જપ્ત કરાયેલો મુદ્દામાલ
આ કાર્યવાહીમાં પોલીસે કુલ ₹3,75,440/-નો મુદ્દામાલ કબજે કર્યો છે, જેમાં નીચે મુજબનો સમાવેશ થાય છે:
- 19.274 કિલોગ્રામ ગાંજો, જેની કિંમત ₹1,92,740/- આંકવામાં આવી છે.
- ચાર મોબાઈલ ફોન, જેની કિંમત ₹1,25,000/-.
- હોન્ડા કંપનીની એક્ટિવા-125 મોટરસાયકલ (રજી.નં. GJ-39-E-7892), જેની કિંમત ₹50,000/-.
- રોકડા ₹7,700/-.
- એક ગ્રાહક વીજ બિલ, ચાર પ્લાસ્ટિકની કોથળીઓ, એક ઝીપવાળી પ્લાસ્ટિકની કોથળી, એક સુટકેસ બેગ, અને સેલોટેપ લગાવેલ નવ ખાલી પેકેટ.
દરોડાની વિગતવાર કાર્યવાહી
પોલીસે હરપાલસિંહના મકાન પર દરોડો પાડ્યો હતો. મકાનમાં પ્રવેશ કરતા જ હરપાલસિંહ મળી આવ્યો હતો. તેની અને મકાનની અંગઝડતી કરતા કાળા કલરની બેગમાંથી પ્લાસ્ટિકની થેલીઓમાં છુપાવેલો ગાંજો મળી આવ્યો હતો. FSL અધિકારીએ પ્રાથમિક પરીક્ષણમાં પદાર્થ ગાંજો હોવાનું પુષ્ટિ કરી હતી.
હરપાલસિંહની પૂછપરછ કરતા તેણે હોલમાં બેઠેલા જોગેન્દ્રસિંહ લક્ષ્મણસિંહ વાઘેલા અને મનોજ ભાગવત શર્માના નામ આપ્યા હતા, જેઓ તેને ગાંજો આપવા આવ્યા હોવાનું જણાવ્યું હતું. મનોજ શર્માની પૂછપરછ કરતા તેણે જણાવ્યું કે તે પોતાની એક્ટિવા મોટરસાયકલ પર એક લાલ કલરની ટુરિસ્ટ બેગમાં ગાંજો લાવ્યો હતો. એક્ટિવા અને બેગની તલાશી લેતા તેમાં ખાખી કલરની સેલોટેપ વીંટાળેલા ગાંજાના 9 પેકેટ મળી આવ્યા હતા. મનોજ શર્માએ કબૂલ્યું કે તેને આ ગાંજાનો જથ્થો અનુ ઉડીઓ પાસેથી મળ્યો હતો.
પોલીસે તમામ મુદ્દામાલ કબ્જે કરી, આરોપીઓ વિરુદ્ધ ગુનો નોંધી વધુ તપાસ હાથ ધરી છે.
