- કર્તવ્ય ગ્રુપ દ્વારા પ્રતિમાની સફાઈ અને પુષ્પમાળા અર્પણ
ગાંધીધામ ટુડે, ન્યૂઝ : 11 સપ્ટેમ્બર 1893 એ દિવસે શિકાગો ખાતે યોજાયેલી વિશ્વ ધર્મ પરિષદમાં સ્વામી વિવેકાનંદજી દ્વારા આપેલું ઐતિહાસિક ભાષણ આજે પણ સમગ્ર વિશ્વને પ્રેરણા આપે છે. આ ઐતિહાસિક પ્રસંગની યાદમાં ગાંધીધામ ખાતે કર્તવ્ય ગ્રુપ દ્વારા વિશેષ કાર્યક્રમનું આયોજન કરવામાં આવ્યું હતું.
ગાંધીધામ શહેરના મધ્યસ્થળે આવેલી સ્વામી વિવેકાનંદજીની પ્રતિમાની સફાઈ કરી તેને પુષ્પમાળા અર્પણ કરીને તેમની જ્ઞાની-પ્રેરણાદાયી વિચારોને યાદ કરવામાં આવ્યા. કાર્યક્રમમાં ગાંધીધામ ચેમ્બર ઓફ કોમર્સના પ્રમુખ શ્રી મહેશભાઈ પુંજ, નગરપાલિકાના પૂર્વ પ્રમુખ શ્રી તેજસભાઈ શેઠ તથા કર્તવ્ય ટીમના કાર્યકર્તાઓ ઉપસ્થિત રહ્યા હતા.
આ અવસરે ઉપસ્થિત મહાનુભાવોએ સ્વામી વિવેકાનંદજીના વિચારો અને તેમના સંદેશાઓને આજના સમયમાં પણ અત્યંત પ્રાસંગિક ગણાવ્યા. તેમણે જણાવ્યું કે સ્વામીજીનું શિકાગોનું ભાષણ માત્ર ભારતીય સંસ્કૃતિનું જ નહીં પરંતુ સમગ્ર માનવજાતિ માટે એકતા, સહિષ્ણુતા અને સર્વધર્મ સમભાવનું પાયાનું સંદેશ છે.
કર્તવ્ય ગ્રુપના સભ્યોએ જણાવ્યું કે આ પ્રકારના કાર્યક્રમો દ્વારા યુવા પેઢીમાં સ્વામીજીના વિચારોને જીવંત રાખવાનો પ્રયત્ન કરવામાં આવે છે. તેમની વિચારધારા દ્વારા સમાજમાં રાષ્ટ્રપ્રેમ, માનવતા અને સંસ્કારના મૂલ્યો વિકસે તે જ મૂળ હેતુ છે.
આ કાર્યક્રમ દ્વારા ગાંધીધામ શહેરમાં દેશભક્તિ અને સાંસ્કૃતિક જાગૃતિનો સંદેશ પ્રસરી રહ્યો છે. સ્થાનિક નાગરિકોએ પણ કર્તવ્ય ગ્રુપની આ પહેલને બિરદાવતાં કહ્યું કે આવી પ્રવૃત્તિઓ સતત થતી રહે તે જરૂરી છે જેથી સમાજને સાચા અર્થમાં પ્રેરણા મળે.
