ગાંધીધામ ટુડે, ન્યૂઝ : ગાંધીધામ મહાનગરપાલિકા દ્વારા શહેરના ગુરુકુળ સિંધુબાગ રોડ પર થયેલા ગેરકાયદેસર દબાણોને દૂર કરવાની કાર્યવાહી શરૂ કરવામાં આવી છે. આ કાર્યવાહીના ભાગરૂપે, મહાનગરપાલિકાની ટીમ દ્વારા જીડીએ (ગાંધીધામ ડેવલપમેન્ટ ઓથોરિટી) અને એસઆરસી (સ્પેસ રીમુવલ કમિટી)ના અધિકારીઓ સાથે મળીને એક સર્વે હાથ ધરવામાં આવ્યો હતો. આ સર્વેમાં, રોડની સરહદો અને આર્કેડ પર થયેલા દબાણોની ઓળખ કરવામાં આવી હતી.
આ સર્વે દરમિયાન કુલ 65 જેટલી મિલકતો પર ગેરકાયદેસર દબાણ હોવાનું માલુમ પડ્યું હતું. આ તમામ મિલકતોને મહાનગરપાલિકા દ્વારા દબાણ હટાવવા માટે નોટિસ પાઠવવામાં આવી છે. આ કાર્યવાહીમાં જીડીએના મનોજ ટિકિયાની, એસઆરસીના ભગવાન ગિરિયાની, અને જીડીએમસીના અનિલ પ્રજાપતિ, ગાયત્રીપ્રસાદ જોષી, લક્ષ્મણ બુચિયા અને જીતુ દેવરીયા જેવા ઉચ્ચ અધિકારીઓ જોડાયા હતા.
નોટિસમાં ઉલ્લેખ કરવામાં આવ્યો છે કે જો નિર્ધારિત સમયમર્યાદામાં દબાણ દૂર નહીં થાય, તો મહાનગરપાલિકા દ્વારા કાયદેસરની કાર્યવાહી કરવામાં આવશે અને દબાણો બળપૂર્વક દૂર કરવામાં આવશે. આ ઝુંબેશનો મુખ્ય ઉદ્દેશ્ય શહેરમાં ટ્રાફિકની સમસ્યા હળવી કરવાનો અને જાહેર માર્ગોને ખુલ્લા કરવાનો છે.
