ગાંધીધામ ટુડે, ન્યૂઝ : કચ્છના આર્થિક પાટનગર અને લઘુ ભારત તરીકે ઓળખાતા ગાંધીધામમાં ભક્તિમય માહોલ જોવા મળ્યો હતો, જ્યાં ‘હર હર મહાદેવ’ના જયઘોષ સાથે ભવ્ય કાવડયાત્રાનું આયોજન કરવામાં આવ્યું હતું. દેશના વિવિધ પ્રાંતોમાંથી આવેલા લોકોએ ગાંધીધામને પોતાની કર્મભૂમિ બનાવી છે, અને અહીં તેઓ પોતાના રીતિ-રિવાજો અને ઉત્સવોને ઉત્સાહભેર ઉજવે છે. તે અંતર્ગત, ઉત્તરપ્રદેશ અને આસપાસના રાજ્યોમાં વિશેષ મહત્વ ધરાવતી કાવડયાત્રા પણ દર વર્ષની જેમ આ વર્ષે પણ ધામધૂમથી યોજાઈ હતી.
આ કાવડયાત્રા વિદ્યાવાસીની સેવા સમિતિના અધ્યક્ષ શ્રી છોટેલાલજી યાદવના નેતૃત્વ હેઠળ આયોજિત કરવામાં આવી હતી. પરંપરા મુજબ, કાવડિયાઓએ ગળપાદરના નાગા બાવા મંદિરથી યાત્રાનો પ્રારંભ કર્યો હતો, જ્યાંથી તેઓએ કાવડમાં પવિત્ર જળ ભરીને માલારા મહાદેવ મંદિર તરફ પ્રયાણ કર્યું હતું. ઢોલ-નગારાના તાલે અને ભક્તિસભર વાતાવરણમાં કાવડિયાઓએ માલારા મહાદેવ મંદિરે પહોંચી ભગવાન શિવને જળ અર્પણ કરી પૂજા-અર્ચના કરી હતી.
આ અવસરે ગાંધીધામની શહેર પ્રત્યે સમર્પિત સંસ્થા સિંધુ પ્રેમ ટ્રસ્ટના અધ્યક્ષ શ્રી રમેશ તારાચંદ ધનવાણીએ કાવડિયાઓનું અભિવાદન કરી તેમને શુભકામનાઓ પાઠવી હતી.
મા વિદ્યાવાસીની સેવા સમિતિના સદાનંદ સહાની, શિવનાદ સહાની, કપિલદેવ વર્મા, રામનગીના યાદવ, મદન યાદવ, શેલેન્દ્ર શર્મા, આનંદ જયસ્વાલ, જીવતલાલ જયસ્વાલ, વિજય પ્રકાશ કુશવાહ, દીપક પાસવાન, શાહીબ દિનકર, રોહિત ગુપ્તા, અને મહામંત્રી વેદપ્રકાશ દુબે, વિજયભાઈ મોર્યા સહિત અનેક મહાનુભાવોએ આ કાવડયાત્રાના આયોજનમાં સહયોગ આપ્યો હતો.
આ કાવડયાત્રાએ ગાંધીધામની સાંસ્કૃતિક વિવિધતા અને ભક્તિભાવનું ઉત્તમ ઉદાહરણ પૂરું પાડ્યું હતું.
