ગાંધીધામ ટુડે, ન્યૂઝ : ગુજરાત DGPની સ્ટેટ મોનિટરિંગ સેલ (SMC)ની ટીમે ભુજમાં એક મોટી કાર્યવાહી કરીને ઓનલાઈન ક્રિકેટ સટ્ટો રમાડતા એક શખ્સને ઝડપી પાડ્યો છે. મંગળવારે મોડી રાત્રે ભુજના ખેંગાર પાર્ક ત્રણ રસ્તા પાસેથી સ્મિત કૈલાશકુમાર ઠક્કર (ગણાત્રા), રહે. ઓધવ રેસીડેન્સી, ભુજ, નામના શખ્સની ધરપકડ કરવામાં આવી હતી. આ કૌભાંડમાં કુલ 10થી વધુ શખ્સોની સંડોવણી સામે આવી છે, જેમાં મુખ્ય આરોપી હિમાંશુ કિલિંગર છે, જે Vegasbook9.Com પર માસ્ટર ID આપતો હતો.
ઝડપાયેલો મુદ્દામાલ અને કૌભાંડનું કદ
SMCએ આરોપી પાસેથી ₹10,200 રોકડા, ₹60,000નો મોબાઈલ ફોન અને ₹5 લાખની કિંમતની કાર સહિત કુલ ₹5.70 લાખનો મુદ્દામાલ જપ્ત કર્યો છે. તપાસ દરમિયાન, Vegasbook9.Com પરના બે IDમાં કુલ ₹2.65 કરોડનું બેલેન્સ મળી આવ્યું છે, જે આ કૌભાંડના વિશાળ કદનો સંકેત આપે છે.
ફરાર આરોપીઓ અને વધુ તપાસ
આ કેસમાં મુંબઈના વિશાલ મહેશ્વરી, નલિયાના એક અજાણ્યા ઇસમ, સલીમ, જયદીપ શાહ, આનંદ રાજ અને ભુજના આકાશ સહિત અન્ય ઘણા શખ્સો ફરાર છે. આ કેસની વધુ તપાસ ભુજ ‘A’ ડિવિઝન પોલીસને સોંપવામાં આવી છે.
પશ્ચિમ કચ્છમાં SMCની સતર્કતા
ઉલ્લેખનીય છે કે, પશ્ચિમ કચ્છમાં SMC અને અન્ય પોલીસ ટીમો નોંધપાત્ર દરોડા પાડી રહી છે. તાજેતરમાં જ વિદેશી દારૂનો મોટો જથ્થો ઝડપાયા બાદ હવે ક્રિકેટ સટ્ટા પર સચોટ કાર્યવાહી કરવામાં આવી છે. અગાઉ માંડવીના ત્રગડી ગામે ₹83 લાખથી વધુનો દારૂ જપ્ત થયા બાદ પશ્ચિમ કચ્છ પોલીસના લોકલ ક્રાઈમ બ્રાન્ચના ઇન્સ્પેક્ટર સંદીપસિંહ ચુડાસમાની બદલી કરવામાં આવી હતી, જ્યારે માંડવીના પોલીસ ઇન્સ્પેક્ટર અને બીટ જમાદારને સસ્પેન્ડ કરવામાં આવ્યા હતા. ભુજમાંથી ઝડપાયેલા કરોડો રૂપિયાના ક્રિકેટ સટ્ટા કાંડ મામલે પણ જવાબદાર પોલીસ અધિકારીઓ સામે પગલાં લેવામાં આવશે તેવી શક્યતા છે.
