ગાંધીધામ ટુડે, ન્યૂઝ : રાજ્યના ગૃહ રાજ્યમંત્રી હર્ષ સંઘવીએ જણાવ્યું છે કે રાજ્યમાં કાયદો અને વ્યવસ્થા મજબૂત બનાવવા માટે પોલીસ તંત્રને પૂરતી સત્તાઓ અપાઈ છે અને હવે સમય છે કે એ સત્તાઓનો યોગ્ય રીતે ઉપયોગ કરવામાં આવે. તેમણે સ્પષ્ટ કહ્યું કે “પોલીસનું નામ સાંભળીને ગુનેગાર દૂર ભાગવો જોઈએ. સામાન્ય નાગરિકને ડર નહીં, પણ સુરક્ષા આપવી – એ પોલીસ તંત્રનો ઉદ્દેશ હોવો જોઈએ.”
હર્ષ સંઘવી સુરતના અલથાણ વિસ્તારમાં સેન્ટ થોમસ સ્કૂલની નજીક આવેલા નવા નિર્મિત અલથાણ પોલીસ સ્ટેશનના ઉદ્ઘાટન પ્રસંગે હાજર રહ્યા હતા. આ પ્રસંગે પ્રદેશના અનેક વરિષ્ઠ પોલીસ અધિકારીઓ, ધારાસભ્યો અને નગરજનો મોટી સંખ્યામાં ઉપસ્થિત રહ્યા હતા.
પોલીસને આપેલા દંડા અને સત્તાઓનો ઉપયોગ કરો: સંઘવીની સ્પષ્ટતા
This Article Includes
પ્રસંગે સંઘવીએ પોલીસકર્મીઓને સંબોધન કરતાં કહ્યું કે, “તમને આપેલી સત્તાઓનો અધિક ઉપયોગ કરો, જરૂર પડે તો ડબલ ઉપયોગ કરો – હું તમારા સાથે છું.” તેઓએ ઉમેર્યું કે, “દંડો સામાન્ય નાગરિકને હેરાન કરવા માટે નહીં, પણ ગુનેગારોને કાબૂમાં લેવા માટે છે. તેનો ઉપયોગ વિચારપૂર્વક અને નિષ્ઠાથી થવો જોઈએ.”
તેમણે વધુમાં જણાવ્યું કે રાજ્ય સરકારનો હેતુ પોલીસ તંત્રને વધુ સશક્ત, ટેક્નોલોજી સમૃદ્ધ અને સુવિધાયુક્ત બનાવવાનો છે. પોલીસ સ્ટેશનોના ભૌતિક માળખાના વિકાસથી લઈને તેમની કામગીરીમાં આધુનિકતા લાવવી એ સરકારનું ધ્યેય છે.
ટેકનોલોજીથી સજ્જ તંત્ર – આંકડાઓથી લઇને નૈતિક શક્તિ સુધીમાં સુધારો
ગૃહ રાજ્યમંત્રીએ માહિતી આપી કે આજના યુગમાં ટેક્નોલોજી પોલીસ કાર્યક્ષમતા માટે અવશ્યક બની ગઈ છે. અને ગુજરાત પોલીસ તેનો યોગ્ય રીતે અમલ કરી રહી છે. તેમણે પોલીસને “સર્વસામાન્ય લોકોની સુરક્ષાનું સંચાલન કરતી સેવા સંસ્થા” તરીકે ઓળખાવી અને રાજ્યના દરેક જિલ્લામાં કાયદો વ્યવસ્થાની સુસંગતતા જળવાઈ રહે એ માટે પ્રતિબદ્ધતા દર્શાવી.
સુરક્ષા સાથે સંવેદના પણ જરૂરી
આ પ્રસંગે ભવિષ્યમાં પોલીસની જવાબદારી વધતી જાય તેવો સંદેશ પણ આપવામાં આવ્યો. “પોલીસ સત્તાવાળું તંત્ર છે, પણ તેમાં સંવેદનશીલતા અને માનવતાની ભાવના પણ હોવી જોઈએ,” તેમ અંતમાં હર્ષ સંઘવીએ ઉમેર્યું.
