ગાંધીધામ ટુડે, ન્યૂઝ : ડોનાલ્ડ ટ્રમ્પના શાસનકાળમાં ભારત-અમેરિકા સંબંધોમાં ફરી તણાવ જોવા મળી રહ્યો છે. 25% ટેરિફ લાદવાની જાહેરાત બાદ અમેરિકાએ ઈરાન સાથેના પેટ્રોલિયમ ઉત્પાદનોના વ્યવહાર બદલ 6 ભારતીય કંપનીઓ પર પ્રતિબંધ મૂક્યો છે. આ કંપનીઓમાં આલ્કેમિકલ સોલ્યુશન્સ પ્રાઇવેટ લિમિટેડ, ગ્લોબલ ઈન્ડસ્ટ્રિયલ કેમિકલ્સ લિમિટેડ, જ્યુપિટર ડાય કેમ પ્રાઇવેટ લિમિટેડ, રમણીકલાલ એસ ગોસાલિયા એન્ડ કંપની, પર્સિસ્ટન્ટ પેટ્રોકેમ પ્રાઇવેટ લિમિટેડ અને કંચન પોલિમર નો સમાવેશ થાય છે.
કેમ લીધો અમેરિકાએ આ નિર્ણય?
This Article Includes
અમેરિકાના ડિપાર્ટમેન્ટ ઓફ સ્ટેટે બુધવારે (30મી જુલાઈ, 2025) 20 વૈશ્વિક સંસ્થાઓ પર પ્રતિબંધોની જાહેરાત કરતા જણાવ્યું કે, “ઈરાની શાસન તેની અસ્થિર પ્રવૃત્તિઓને નાણાં આપવા માટે મિડલ ઈસ્ટમાં સંઘર્ષને ભડકાવવાનું ચાલુ રાખે છે. આજે અમેરિકા તેના રેવન્યુના પ્રવાહને રોકવા માટે કાર્યવાહી કરી રહ્યું છે જેનો ઉપયોગ શાસન વિદેશમાં આતંકવાદને સમર્થન આપવા તેમજ લોકો પર જુલમ કરવા માટે કરે છે.”
આ પ્રતિબંધો ભારત, સંયુક્ત આરબ અમીરાત (UAE), તુર્કી અને ઇન્ડોનેશિયાની કંપનીઓ પર ઈરાની મૂળના પેટ્રોકેમિકલ ઉત્પાદનોના વેચાણ અને ખરીદી માટે મૂકવામાં આવ્યા છે.
પ્રતિબંધિત ભારતીય કંપનીઓ અને તેમના પરના આરોપો:
- આલ્કેમિકેલ સોલ્યુશન્સ પ્રાઇવેટ લિમિટેડ: આ કંપની પર જાન્યુઆરીથી ડિસેમ્બર 2024 વચ્ચે $84 મિલિયનથી વધુ મૂલ્યના ઈરાની મૂળના પેટ્રોકેમિકલ ઉત્પાદનોની આયાત અને ખરીદી કરવાનો આરોપ છે.
- ગ્લોબલ ઈન્ડસ્ટ્રિયલ કેમિકલ્સ લિમિટેડ: તેના પર જુલાઈ 2024 થી જાન્યુઆરી 2025 વચ્ચે $51 મિલિયનથી વધુ મૂલ્યના મિથેનોલ સહિત ઈરાની ઉત્પાદનોની આયાત અને ખરીદી કરવાનો આરોપ છે.
- જ્યુપિટર ડાઈ કેમ પ્રાઇવેટ લિમિટેડ: આ કંપની પર જાન્યુઆરી 2024 થી જાન્યુઆરી 2025 વચ્ચે $49 મિલિયનથી વધુ મૂલ્યના ટોલ્યુએન સહિત ઈરાની મૂળના પેટ્રોકેમિકલ ઉત્પાદનોની આયાત અને ખરીદી કરવાનો આરોપ છે.
- રમણીકલાલ એસ ગોસાલિયા એન્ડ કંપની: આ કંપની પર જાન્યુઆરી 2024 થી જાન્યુઆરી 2025 વચ્ચે મિથેનોલ અને ટોલ્યુએન સહિત $22 મિલિયનથી વધુ મૂલ્યના ઈરાની ઉત્પાદનોની આયાત અને ખરીદી કરી હોવાનો આરોપ છે.
- પર્સિસ્ટન્ટ પેટ્રોકેમ પ્રાઇવેટ લિમિટેડ: આ કંપનીએ ઓક્ટોબરથી ડિસેમ્બર 2024 વચ્ચે UAE સ્થિત બાબ અલ બરશા સહિત અનેક કંપનીઓ પાસેથી મિથેનોલ જેવા ઈરાની મૂળના પેટ્રોકેમિકલ્સ ધરાવતા આશરે $14 મિલિયનના શિપમેન્ટની આયાત કરી હોવાનો આરોપ છે.
- કંચન પોલિમર: આ કંપની પર તાનાઈસ ટ્રેડિંગ પાસેથી $1.3 મિલિયનથી વધુ કિંમતના ઈરાની મૂળના પેટ્રોકેમિકલ ઉત્પાદનો, જેમાં પોલિઇથિલિનનો સમાવેશ થાય છે, આયાત અને ખરીદી કરવાનો આરોપ છે.
આ તમામ ભારતીય કંપનીઓને એક્ઝિક્યુટિવ ઓર્ડર 13846 ની કલમ 3(a)(iii) હેઠળ ઈરાનથી પેટ્રોકેમિકલ ઉત્પાદનોની ખરીદી-વેચાણ, પરિવહન અથવા માર્કેટિંગમાં જાણી જોઈને મહત્વપૂર્ણ વ્યવહારમાં સામેલ થવા બદલ નિયુક્ત કરાઈ છે.
25% ટેરિફનો ભાર: શું છે ડોનાલ્ડ ટ્રમ્પનો નવો દાવ?
30મી જુલાઈના રોજ ટ્રુથ સોશિયલ પર એક પોસ્ટ કરીને અમેરિકન પ્રમુખ ડોનાલ્ડ ટ્રમ્પે ભારત પર 25% ટેરિફ લાદવાની જાહેરાત કરી હતી. તેમણે લખ્યું, “ભારત રશિયા પાસેથી ખૂબ જ મોટા પાયે હથિયારો અને ઓઈલ ખરીદી રહ્યું છે. હાલ આખું વિશ્વ ઈચ્છે છે કે, રશિયા યુક્રેનમાં હુમલા કરવાનું બંધ કરે. આ બધું યોગ્ય નથી થઈ રહ્યું. આ માટે ભારતે પણ 25% ટેરિફ અને દંડ ચૂકવવો પડશે. આ નિયમ પહેલી ઓગસ્ટથી લાગુ થઈ જશે. આભાર. મેક અમેરિકા ગ્રેટ અગેઇન.”
આ નિર્ણય ભારતીય અર્થતંત્ર પર નોંધપાત્ર અસર કરી શકે છે અને બંને દેશો વચ્ચેના વેપાર સંબંધોમાં વધુ તણાવ ઊભો કરી શકે છે. શું આ નવી કાર્યવાહી ભારતને અમેરિકા સાથેના સંબંધો પર પુનર્વિચાર કરવા મજબૂર કરશે?
