ગાંધીધામ ટુડે, ન્યૂઝ : અંજાર તાલુકાના તુણા ગામમાં એક ચોંકાવનારી ઘટના સામે આવી છે, જ્યાં ગામના સરપંચ પર અરજદારો સાથે ગેરવર્તણૂક કરવાનો આક્ષેપ મૂકવામાં આવ્યો છે. આ સમગ્ર ઘટનાનો વિડીયો સોશિયલ મીડિયા પર વાયરલ થઈ રહ્યો છે, જેના કારણે ભારે ચર્ચા જાગી છે.
શાળા પાસે સ્પીડ બ્રેકર બનાવવા મુદ્દે વિવાદ
આ ઘટનાની વિગતો અનુસાર, તુણા ગામના રહેવાસીઓ સ્થાનિક પ્રાથમિક શાળા નજીકથી ઝડપભેર પસાર થતા વાહનોને કારણે ચિંતિત હતા. આ મામલે રજૂઆત કરવા માટે રમઝાન ઈશા મુગરાની, નુરમામદ ઈશા ચાવડા, અસગર સુલેમાન ખારા અને મહેબુબશા સૈયદ સહિતના ગ્રામજનો ગ્રામ પંચાયત કચેરીએ ગયા હતા. તેઓ શાળામાં શૌચાલય અને બહાર સ્પીડ બ્રેકર બનાવવાની માંગ સાથે સરપંચ હુસેન અબ્દુલા બુચડને મળવા પહોંચ્યા હતા.
સરપંચ પર નશામાં હોવાનો અને ગાળો બોલવાનો આક્ષેપ
અરજદારોએ તાલુકા વિકાસ અધિકારીને આપેલી લેખિત ફરિયાદમાં જણાવ્યું છે કે, રજૂઆત દરમિયાન સરપંચ નશાની હાલતમાં હતા. તેમણે અરજદારો સાથે ઉશ્કેરાઈને ગાળાગાળી કરી હતી. એટલું જ નહીં, સરપંચે ટેબલ-ખુરશી ઉપાડીને મારવાની પણ કોશિશ કરી હોવાનો આક્ષેપ મૂકવામાં આવ્યો છે. અરજદારોનું કહેવું છે કે, આ પહેલા માહિતી અધિકાર હેઠળ પંચાયતમાં અરજી કરી હોવાને કારણે સરપંચે મનદુઃખ રાખીને આ પ્રકારનું વર્તન કર્યું હતું.
ઘટનાનો વિડીયો વાયરલ
આ સમગ્ર ઘટના દરમિયાન ગ્રામજનોએ મોબાઈલ ફોન પર વિડીયો બનાવી લીધો હતો. આ વિડીયોમાં સરપંચ ઉગ્ર સ્વભાવમાં જોવા મળે છે અને તેમની વર્તણૂક અરજદારો સાથે અસભ્ય હોવાનું જણાય છે. આ વિડીયો હાલ સોશિયલ મીડિયા પર ઝડપથી વાયરલ થઈ રહ્યો છે અને લોકો આ મામલે રોષ વ્યક્ત કરી રહ્યા છે. અરજદારોએ ન્યાયની માંગ સાથે તાલુકા પંચાયત કચેરીમાં લેખિત ફરિયાદ નોંધાવી છે.
