ગાંધીધામ ટુડે, ન્યૂઝ : ગાંધીધામ મહાનગરપાલિકાએ શહેરના સેક્ટર-1 A અને ગુજરાત હાઉસિંગ બોર્ડમાં રસ્તાઓ અને પાણીની લાઈનો પર થયેલા દબાણો દૂર કરવા માટે કડક પગલાં લીધા છે. તાજેતરમાં, કુલ 25 દબાણકર્તાઓને નોટિસ ફટકારવામાં આવી છે, જેમાં તેમને સ્વેચ્છાએ અતિક્રમણ દૂર કરવા જણાવ્યું છે. જો નિર્ધારિત સમયમર્યાદામાં આ દબાણો દૂર કરવામાં નહીં આવે, તો તંત્ર દ્વારા જેસીબી (JCB) વડે કાર્યવાહી કરવામાં આવશે.
ગાંધીધામ-આદિપુર જોડિયાં શહેરોમાં ટ્રાફિકની સમસ્યા વધી રહી છે, જેનું મુખ્ય કારણ રોડ, ગટર અને પાણીની લાઈનો પર થયેલા દબાણો છે. આ અતિક્રમણોને કારણે આવશ્યક સેવાઓ પર પણ ગંભીર અસર થઈ રહી છે. અગાઉની નગરપાલિકા દ્વારા આ બાબતે કોઈ ખાસ કાર્યવાહી કરવામાં આવી નહોતી, પરંતુ હવે મહાનગરપાલિકા સક્રિય બની છે.
આ કાર્યવાહીના ભાગરૂપે, સેક્ટર-1 A માં રસ્તા પર મોટા પાયે થયેલા દબાણો માટે 10 થી વધુ લોકોને નોટિસ અપાઈ છે, જ્યારે ગુજરાત હાઉસિંગ બોર્ડમાં પીવાના પાણીની લાઈનો પરના દબાણો માટે 13 થી વધુ દબાણકર્તાઓને નોટિસ મોકલાઈ છે. આ ઉપરાંત, કિડાણામાં પણ ત્રણ દબાણકર્તાઓને નોટિસ ફટકારવામાં આવી છે.
મહાનગરપાલિકાની આ કાર્યવાહી બાદ ઘણા દબાણકર્તાઓએ સ્વેચ્છાએ દબાણો દૂર કરવાનું શરૂ કર્યું હોવાના અહેવાલો છે. તંત્રની આ સક્રિયતાથી શહેરમાં ટ્રાફિક અને અન્ય સેવાઓ વધુ સુચારુ બનશે તેવી આશા છે. જોકે, મુખ્ય બજારો અને આર્કેડમાં થયેલા દબાણો દૂર કરવા અને પાર્કિંગની વ્યવસ્થા ઊભી કરવા માટે પણ કાર્યવાહી થવી જરૂરી છે, જેના પર હાલ પ્રશ્નો ઉઠી રહ્યા છે.
