ગાંધીધામ ટુડે, ન્યૂઝ : આ ચોમાસામાં ગુજરાતમાં વરસાદી પાણીથી રસ્તાઓ ધોવાઈ ગયા છે, અને ઠેર ઠેર પડેલા ખાડાઓએ સરકારની કામગીરીની પોલ ખોલી નાખી છે. ગુજરાતભરમાં રસ્તાઓની બિસ્માર હાલત અને તેના કારણે સર્જાયેલા અકસ્માતોને લીધે લોકોમાં ભારે આક્રોશ જોવા મળી રહ્યો છે. નેશનલ ક્રાઈમ રેકોર્ડ બ્યુરો (NCRB) ના આંકડા અનુસાર, ગુજરાતમાં ખાડાઓને કારણે 95થી વધુ લોકોએ જીવ ગુમાવ્યા છે, જે દર્શાવે છે કે આ ખાડાઓ હવે જીવલેણ સાબિત થઈ રહ્યા છે.
કોન્ટ્રાક્ટરો અને ભ્રષ્ટ અધિકારીઓની મિલીભગત
This Article Includes
આ વર્ષે ભારે વરસાદને કારણે શહેરી અને ગ્રામ્ય વિસ્તારોમાં રસ્તાઓ અત્યંત બિસ્માર બન્યા છે. ઠેર ઠેર ખાડા પડતાં વાહનચાલકોને ભારે હાલાકીનો સામનો કરવો પડી રહ્યો છે. આ ખાડાવાળા રસ્તાઓ માર્ગ અને મકાન વિભાગમાં ચાલતા વ્યાપક ભ્રષ્ટાચારનો જીવતો જાગતો પુરાવો છે. મળતિયા કોન્ટ્રાક્ટરો અને ભ્રષ્ટ અધિકારીઓની મિલીભગતને કારણે રસ્તાઓનું બાંધકામ અત્યંત નબળી ગુણવત્તાનું થઈ રહ્યું છે. એસી ચેમ્બરમાં બેઠેલા અધિકારીઓના આશીર્વાદથી ટેન્ડરોમાં મોટા પાયે ‘ખાયકી’ (ભ્રષ્ટાચાર) થઈ રહી છે, જેના પરિણામે નવા બનેલા રસ્તાઓ પણ એક જ વરસાદમાં ધોવાઈ જાય છે.
સરકારે શહેરોમાં રસ્તાના સમારકામ માટે રૂ. 167 કરોડની મોટી ફાળવણીની જાહેરાત કરી હોવા છતાં, કરોડો રૂપિયાના ખર્ચ પછી પણ આજે પણ ઘણા શહેરોમાં રસ્તાઓ ઉબડ-ખાબડ જ રહ્યા છે.
ખાડામાં પડવાથી મોત: ગુજરાત દેશમાં પાંચમા ક્રમે
વર્ષ 2022ના NCRBના અહેવાલ મુજબ, ખાડાથી થયેલા મૃત્યુના મામલે ગુજરાત દેશમાં પાંચમા ક્રમે છે, જે ચિંતાજનક બાબત છે. ગુજરાતમાં ખાડામાં પડવાને કારણે 75 પુરુષો અને 21 મહિલાઓ સહિત કુલ 96 લોકોના મૃત્યુ થયા છે. સમગ્ર ભારતમાં ખાડાઓને કારણે 800થી વધુ લોકોના મોત થયા છે, જેમાં રાજસ્થાન 124 મૃત્યુ સાથે પ્રથમ સ્થાને છે. ત્યારબાદ મહારાષ્ટ્રમાં 113 અને મધ્યપ્રદેશમાં 104 લોકોના મોત થયા છે.
આ આંકડા સ્પષ્ટપણે દર્શાવે છે કે રસ્તાઓની ખરાબ ગુણવત્તા અને ભ્રષ્ટાચાર સીધો જ લોકોના જીવ જોખમમાં મૂકી રહ્યા છે. સરકારને આ મુદ્દે તાત્કાલિક અને કડક પગલાં લેવાની જરૂર છે, જેથી ભવિષ્યમાં આવા અકાળ મૃત્યુ ટાળી શકાય.
