ગાંધીધામ ટુડે, ન્યૂઝ: પૂર્વ કચ્છ-ગાંધીધામ જિલ્લા પોલીસ દળના ૪૭ કર્મચારીઓને તાજેતરમાં પ્રમોશન મળ્યા બાદ, જિલ્લા પોલીસ અધિક્ષકની કચેરી દ્વારા આજે પોલીસ તાલીમ ભવન (DTC) ખાતે એક ખાસ ‘પાઈપિંગ સેરેમની’નું આયોજન કરવામાં આવ્યું હતું.
SP સાગર બાગમારના હસ્તે બઢતી: પોલીસ અધિક્ષક (SP) સાગર બાગમાર, આઈ.પી.એસ.ના માર્ગદર્શન હેઠળ યોજાયેલા આ સન્માન સમારોહમાં બઢતી મેળવનાર તમામ ૪૭ પોલીસકર્મીઓને નવા રેન્કના સ્ટાર્સ અને પટ્ટાઓ લગાવવામાં આવ્યા હતા.
આ ૪૭ કર્મચારીઓમાં ૧૩ બિન હથિયારી હેડ કોન્સ્ટેબલોને ASI (આસિસ્ટન્ટ સબ-ઇન્સ્પેક્ટર) તરીકે અને ૩૪ બિન હથિયારી પોલીસ કોન્સ્ટેબલોને હેડ કોન્સ્ટેબલ તરીકે હંગામી ધોરણે બઢતી આપવામાં આવી છે.
ઉચ્ચ અધિકારીઓ રહ્યા હાજર: આ ખાસ અવસરે ડીવાયએસપી (હેડક્વાર્ટર) અને કચેરીના અન્ય વરિષ્ઠ અધિકારીઓ તથા ઓફિસ સ્ટાફ મોટી સંખ્યામાં હાજર રહ્યા હતા.
અધિકારીઓએ તમામ બઢતી મેળવનાર કર્મચારીઓને શુભેચ્છાઓ પાઠવી હતી અને તેમની નવી ફરજો માટે પ્રોત્સાહિત કર્યા હતા.
ઉત્સાહનો માહોલ: પૂર્વ કચ્છ પોલીસ અધિક્ષક સાગર બાગમાર દ્વારા આ પ્રસંગે જણાવવામાં આવ્યું હતું કે, “બઢતી મેળવનાર તમામ કર્મચારીઓને પ્રોત્સાહન આપીને તેમના જોશ અને જુસ્સાને વધારવો જરૂરી છે. આ ‘પાઈપિંગ સેરેમની’ થકી સમગ્ર પોલીસ દળમાં ઉત્સાહનો માહોલ સર્જાયો છે અને તમામ કર્મીઓ નવી ઉર્જા સાથે ફરજ બજાવશે.”
ડીટીસી ખાતે યોજાયેલા આ કાર્યક્રમથી સ્પષ્ટ થાય છે કે, પૂર્વ કચ્છ પોલીસ દ્વારા માત્ર પ્રમોશનના કાગળિયાં જ નહીં, પરંતુ કર્મચારીઓના સન્માન અને મનોબળ વધારવા પર પણ ભાર મૂકવામાં આવે છે.
