ગાંધીધામ ટુડે, ન્યૂઝ: ગુજરાતના રાજકારણમાં ભારે ઉથલપાથલના સંકેત મળી રહ્યા છે. મુખ્યમંત્રી ભૂપેન્દ્ર પટેલની સરકારના મંત્રીમંડળનું વિસ્તરણ હવે બહુ દૂર નથી. સૂત્રોના જણાવ્યા અનુસાર, આવતીકાલે મોટો ફેરફાર થવાની સંભાવના છે, જેમાં અનેક વર્તમાન મંત્રીઓના પત્તા કપાઈ શકે છે અને નવા ચહેરાઓને સ્થાન મળશે.
આ મહત્ત્વપૂર્ણ ફેરફારમાં સૌની નજર કચ્છ જિલ્લા પર મંડાયેલી છે, જ્યાંના બે ધારાસભ્યોને મંત્રીમંડળમાં સ્થાન મળી શકે છે. ખાસ વાત એ છે કે, આ પૈકીનું એક નામ રાજકીય પંડિતો માટે પણ સૌથી મોટું સરપ્રાઈઝ સાબિત થઈ શકે છે.
કચ્છના કદાવર નેતા અને યુવા ચહેરાને તક?
This Article Includes
સંભવિત મંત્રીમંડળમાં જે બે કચ્છના નેતાઓના નામની ચર્ચાએ જોર પકડ્યું છે તે નીચે મુજબ છે:
1. અનિરુદ્ધ દવે (માંડવી-મુન્દ્રા)
- કદાવર નેતા: તેમનો સમાવેશ લગભગ નિશ્ચિત માનવામાં આવી રહ્યો છે.
- પાર્ટી પૃષ્ઠભૂમિ: તેઓ મૂળ જનસંઘ પરિવારમાંથી આવે છે અને પૂર્વ રાજ્યસભા સાંસદ સ્વ. અનંત દવેના ભત્રીજા છે.
- સંગઠનમાં અનુભવ: કચ્છ ભાજપના બે ટર્મથી મહામંત્રી અને માંડવી નગરપાલિકાના પૂર્વ પ્રમુખ રહી ચૂક્યા છે.
- સમુદાય અને પરિચય: બ્રાહ્મણ સમુદાયમાંથી આવતા અનિરુદ્ધ દવે વડાપ્રધાન નરેન્દ્ર મોદી સાથે વ્યક્તિગત પરિચય ધરાવે છે. તેઓ વ્યવસાયે વકીલ છે.
2. માલતીબેન મહેશ્વરી (ગાંધીધામ) – ‘સરપ્રાઈઝ’ નામ
- ચોંકાવનારું નામ: માલતીબેન મહેશ્વરીનું નામ સૌથી વધુ ચર્ચામાં છે અને આ નામ જ સૌથી મોટું સરપ્રાઈઝ હશે.
- યુવા ધારાસભ્ય: તેઓ 2017માં સૌથી નાની વયે ભાજપના ધારાસભ્ય બન્યા હતા.
- સામાજિક સમીકરણ: ગાંધીધામ બેઠક પર પ્રભુત્વ ધરાવતા મહેશ્વરી સમુદાયમાંથી આવે છે.
- છબી: તેમની છાપ બિનવિવાદિત ધારાસભ્ય તરીકેની રહી છે.
ફેરબદલનું કારણ: લક્ષ્ય 2027ની ચૂંટણી
સૂત્રોના મતે, આ મંત્રીમંડળ વિસ્તરણ ફક્ત સત્તાનું વિતરણ નથી, પરંતુ 2027ની આગામી વિધાનસભા ચૂંટણી માટેની ભાજપની રણનીતિનો એક ભાગ છે.
હાલમાં ગુજરાતના મંત્રીમંડળમાં 27 મંત્રીઓનો સમાવેશ થઈ શકે છે, પરંતુ માત્ર 17 મંત્રીપદો કાર્યરત છે. બાકીના 10 પદો ખાલી છે. આ ખાલી પદો ભરવા માટે આ વિસ્તરણ કરવામાં આવી રહ્યું છે, જેથી સામાજિક અને પ્રાદેશિક સમીકરણોને યોગ્ય રીતે સંતુલિત કરી શકાય. 2022ની વિધાનસભા ચૂંટણી બાદ આ પહેલો મોટો ફેરફાર છે, જે ગુજરાતના રાજકારણમાં નવો વળાંક લાવી શકે છે.
સમગ્ર ગુજરાતની નજર હવે આવતીકાલના રાજકીય ઘટનાક્રમ પર મંડાયેલી છે.
