- “babu ki jaan” નામના ઈન્સ્ટાગ્રામ પરથી આવી હતી રીક્વેસ્ટ
- હિલ ગાર્ડનમાં દોઢ કલાકની મુલાકાત પછી ખેલ શરુ થયો
- કોંગ્રેસી નગરસેવક સહિત ત્રણ ઝડપાયા : મુસ્કાનની શોધખોળ શરુ
ગાંધીધામ ટુડે ન્યુઝ, : કચ્છમાં ફરી હનીટ્રેપનો એક ચોંકાવનારો કિસ્સો સામે આવ્યો છે. પોલીસ ફરિયાદ પ્રમાણે આદિપુરની મુસ્કાન નામની યુવતીએ સોશિયલ મીડિયા મારફતે યુવકને ફસાવી 22 લાખ રૂપિયા પડાવ્યા છે. આ કેસમાં ભુજના કોંગ્રેસી નગરસેવક સહિત ત્રણ લોકોની અટકાયત કરવામાં આવી છે.
હનીટ્રેપમાં ફસાયેલ અને ભુજમાં મટન શોપ ચલાવનાર મહેબૂબ શબ્બીર ખાટકીની ફરિયાદ મુજબ, આરોપી મુસ્કાને તેને ઇન્સ્ટાગ્રામ પર ફસાવ્યો હતો. બાદમાં તેને ભુજના હિલગાર્ડન પાસે લઈ ગઈ હતી. ત્યાં નગરસેવક અબ્દુલ હમીદ સમાએ બંનેની તસવીરો પાડી હતી. આ કાવતરામાં મુન્દ્રાના કોંગી અગ્રણી હરિસિંહ જાડેજાનું નામ પણ સામે આવ્યું છે, જે ખોટી ઓળખ આપી પોલીસ તરીકે ધમકી આપતો હતો.
આદિપુરની મુસ્કાન અને તેના સાગરીકોએ આવી રીતે મહેબૂબને શીશામાં ઉતાર્યો :
- 17 નવેમ્બરના રોજ તેને બાબુ કી જાન નામના ઈન્સ્ટાગ્રામ એકાઉન્ટ પરથી ફ્રેન્ડ રીક્વેસ્ટ આવેલી. આ એકાઉન્ટ હતું મુસ્કાન નામની યુવતીનું. બીજા દિવસે વોટસએપ નંબર શેર થયા અને વાતો આગળ વધી.
- લગભગ એક અઠવાડિયા બાદ મુસ્કાને મહેબુબને ફોન કરીને જણાવ્યુ કે, હું માધાપર બસે છુ અને મળવા માંગુ છુ. મહેબુબ તેની બુલેટ લઈને મુસ્કાનને મળેલો અને બંને વાતો કરવાના ભુજ હિલ ગાર્ડનમાં આવ્યાં હતાં.
- વાતો કરીને બેઉ પરત નીકળતાં હતા ત્યાં હિલ ગાર્ડનના ગેટ પર એક શખ્સ ઉભેલો હતો. મુસ્કાને આ શખ્સ પોતાનો કાકાજી સસરાં હોવાનું જણાવતાં મહેબુબ ગભરાઈ ગયો હતો.
આ શખ્સે બંને સામે ઈશારો કરતાં મહેબુબ ફટાફટ મુસ્કાનને બુલેટ પર બેસાડીને ત્યાંથી પરત માધાપર ઉતારી ગયો હતો. મુસ્કાનને માધાપર લઈ આવતો હતો ત્યારે રસ્તામાં મુસ્કાનને ફોન પર ફોન આવતાં હતાં. જેમાં વાત કરનાર ‘અમને તે છોકરો જોઈએ છે’ તેમ બોલાતું હતું અને મુસ્કાને તે મહેબુબને સંભળાવી હતી. - ત્યાર બાદ મુસ્કાન સાથેનો ફોટો મોકલી કહ્યું તેના ઘરવાળા તને શોધે છે
ડરી ગયેલો મહેબુબ મુસ્કાનને માધાપર ઉતારીને સીધો લખુરાઈ ચોકડી આવ્યો હતો. ત્યાર બાદ ફળિયામાં રહેતા સરફરાઝ ખાટકીનો ફોન આવ્યો. - સરફરાઝે તેને પૂછ્યું હતું કે ‘તું કોઈ છોકરીને મળવા ગયેલો? તું કોઈ છોકરી સાીથે બેઠો હોય તેવો ફોટો મને ધારાનગરમાં રહેતા હમીદ સમાએ મોકલ્યો છે. છોકરીનો કાકા તમને જોઈ ગયો છે, છોકરીના ઘરવાળા બહુ ખરાબ છે અને તને ગોતે છે’. સરફરાઝે મહેબુબને તે ફોટો મોકલી આપ્યો હતો. ગભરાઈ ગયેલાં મહેબુબે સરફરાઝને મળવા માટે લખુરાઈ ચોકડી બોલાવેલો અને મિત્ર અફીદ ચાકીને પણ બોલાવી લીધો હતો.
- થોડીવાર બાદ સરફરાઝ લખુરાઈ ચોકડી આવેલો. તેણે ત્યાંથી હમીદ સમાને ફોન કરતાં હમીદે તેમને પોતે એલસીબી ઑફિસ બહાર ઊભો હોવાનું જણાવીને મળવા માટે ત્યાં બોલાવ્યાં હતાં. ત્રણે જણ ત્યાં જતા હતા ત્યારે રસ્તામાં મહેબુબને મુસ્કાનનો ફોન આવેલો. મુસ્કાને જણાવેલું કે ‘મને ઘરમાંથી કાઢી મૂકી છે’ એલીસીબી ઑફિસ બહાર હમીદ અને અબ્બાસ ખાટકી બેઉ ઊભાં હતાં. હમીદે મહેબુબ પાસેથી મુસ્કાનનો નંબર મેળવીને તેની જોડે વાત કરતાં મુસ્કાન પોતે બસમાં બેસીને અંજાર જતી હોવાનું જણાવેલું. જેથી તમામ લોકો મુસ્કાનને મળવા અંજાર જવા નિકળ્યા હતા.
- આદિપુર તોલાણી ચાર રસ્તા ખાતે મુસ્કાન તેમને મળેલી. મુસ્કાને તેમને કહેલું કે ‘મને મારા પતિએ ઘરમાંથી કાઢી મૂકી છે, હવે ક્યાં જાઉં?’ હમીદે મહેબુબને મુસ્કાન માટે ઘર લઈ આપવા જણાવ્યુ હતુ
- મામદ મહેબુબ જોડે ઝઘડવા માંડતા હમીદ તેને શાંત પાડીને સાઈડમાં લઈ ગયો હતો. બાદમાં સરફરાઝ, હમીદ, મામદ અને મુસ્કાન અંદરોઅંદર વાતો કરવા માંડેલાં. મામદે તેના મોબાઈલમાં બધાના વીડિયો રેકોર્ડ કર્યા હતા. ‘મને મારી બાયડી જોઈતી નથી, હવે આની જવાબદારી તારી છે’ કહીને ત્યાંથી ગાડી લઈને મામદ જતો રહેલો. મુસ્કાનને લઈ બધા પરત ભુજ આવેલાં. હમીદે મુસ્કાન માટે ઘર ખરીદવા માટે પાંત્રીસ લાખ થશે, પૈસા આપી દે તો મામલો પતી જશે તેમ જણાવીને મહેબુબને રૂપિયા આપવા દબાણ કરેલું. રકઝકના અંતે ૧૯ લાખ રૂપિયામાં પતાવટ કરવાનું નક્કી થયુ હતું.
- મહેબુબે તે જ રાત્રે ઘરમાથી અઢી લાખ રોકડાં અને મહેરુન પાર્કના પ્લોટનો દસ્તાવેજ ખાતરી માટે હમીદને આપી બાકીનો હિસાબ સવારે પતાવી દેવાનો વાયદો કરેલો. હમીદ મુસ્કાનને માંડવી મૂકવા જાઉં છું કહીને તેને લઈ રવાના થયેલો. મહેબુબને ટેન્શનમાં રાખવા થોડીકવાર બાદ સરફરાઝે તેને ફોન કરીને જણાવેલું કે મુસ્કાન બીમાર પડી ગઈ છે અને જી.કે. જનરલમાં દાખલ કરાઈ છે, તું સવારે મેટર પતાવી દેજે કહીને મુસ્કાનને હોસ્પિટલમાં બાટલો ચઢતો હોય તેવા ફોટો મોકલ્યા હતા.
- મહેબુબે ગોલ્ડ લોન પર નવું મકાન લેવાના બહાને તેની માતાના દાગીના પર ૫.૭૫ લાખની લોન મેળવેલી. મોટા બાપા પાસેથી બે લાખ રોકડાં મેળવેલાં, ૨.૨૦ લાખમાં બુલેટ વેચી મારેલું, પાંચ લાખમાં પ્લોટ વેચેલો, મિત્ર પાસેથી પચાસ હજાર રોકડાં અને અંગત બચતના ત્રીસ હજાર એકઠાં કરીને ૧૦ લાખ ભેગાં કરીને હમીદને આપી દીધેલાં અને બાકીના રુપિયાનો થોડાં સમયમાં મેળ કરી દઈ આપી દેવાનો વાયદો કર્યો હતો.
- રાત્રે હમીદ અને મુસ્કાને તેને ભુજમાં આવેલ ગણેશનગર પાસે બોલાવીને જોર જોરથી બોલાચાલી કરીને ગમે તે રીતે અઠવાડિયામાં બાકીના નવ લાખ આપી દેવા ધમકી આપી હતી. મહેબુબે મિત્રો સંબંધીઓ પાસેથી બાકીના નવ લાખ રૂપિયા મેળવીને ભુજમાં વ્યાયામ શાળાએ તેમને આપ્યાં હતાં. આ સમયે હમીદે ગાડીમાંથી સમાધાન પત્ર કાઢીને તેના પર મુસ્કાનનો અંગુઠો અને મહેબુબની સહી કરાવી તે પત્ર પોતાની પાસે રાખી દીધેલો. સરફરાઝ કોરો સ્ટેમ્પ પેપર લઈ આવેલો તેના પર તેણે સમાધાન અંગેનું લખાણ કર્યુ.
- મહેબુબે ૧૯ લાખ ચૂકવ્યાં બાદ ફરી ૭ ડિસેબરે તેને વોટસએપ પર મુસ્કાનના પતિ મામદ નોડેનો ફોન અાવ્યો. મામદે તેને ધમકી આપતાં જણાવેલું કે ‘મારી બૈરી ક્યાં છે? અને મારા છોકરાને પણ લઈ જા નહીંતર હું તારા ઘેર આવું છું’ મહેબુબ ગભરાઈ ગયેલો. તેણે હમીદને પૂછતાં હમીદે જણાવેલું કે ‘મુસ્કાન પતિ મામદના ચાર લાખના દાગીના લઈ ગઈ છે અને દાગીના તને આપ્યાં હોવાનું કહે છે. મામદે આ મુદ્દે ભુજ એ ડિવિઝન પોલીસ મથકમાં અરજી આપી છે’ મહેબુબે પોતાની પાસે કોઈ દાગીના હોવાનો ઈન્કાર કર્યો.
- ૧ જાન્યુઆરીના રોજ મહેબુબને ભુજ એ ડિવિઝનના પોલીસ કર્મચારી તરીકે કોઈએ ફોન કરેલો અને મામદની અરજી સંદર્ભે પોલીસ સ્ટેશન બોલાવેલો.
ડરી ગયેલા મહેબુબે હમીદનો સંપર્ક કરતાં તેણે પોતે આડેસર હોવાનું જણાવી રાત્રે મળવાનું કહેલું. રાત્રે રિલાયન્સ સર્કલ ખાતે હમીદ, સરફરાઝ, અફીદની હાજરીમાં મહેબુબ તેમને મળેલો. હમીદે પોલીસમાં મામલાની પતાવટ માટે ત્રણ લાખ રૂપિયા આપવા પડશે તેમ કહેલું. ડરી ગયેલાં મહેબુબે બીજા દિવસે હમીદને ત્રણ લાખ રૂપિયા આપી દીધાં હતાં. - આરોપીઓએ ફરિયાદીને ડરાવવા અને વિશ્વાસમાં લેવા પોલીસના નામનો ભયંકર દુરુપયોગ કર્યો હતો. ત્રણ લાખ રૂપિયા બાદ મેટરની પતાવટ થઈ ગઈ હોવાની ખાતરી આપવા માટે સરફરાઝે તેના વોટસએપ પરથી મહેબુબને પીઆઈનો આભાર માનતા પત્રની કોપી મોકલેલી. જેમાં મામદ નોડે અને હમીદ સમા, ઓસમાણ શેખ, સરફરાઝની સાક્ષી તરીકે સહીઓ હતી.
- થોડાંક દિવસો અગાઉ મહેબુબના મિત્ર અફીદને જાણ થયેલી કે મુસ્કાને માંડવીમાં પણ આ પ્રકારે કોઈને ફસાવીને ફરિયાદ નોંધાવેલી અને મામદ તેનો પતિ છે જ નહીં. જેથી પોતાની સાથે આરોપીઓએ કાવતરું રચીને રૂપિયા પડાવ્યાં અંગે મહેબુબે પોલીસ ફરિયાદ નોંધાવી છે.
