ગાંધીધામ ટુડે, ન્યૂઝ : બોલીવૂડ અભિનેતા સલમાન ખાનને ફરી એકવાર મોતની ધમકી મળતાં ચકચાર મચી ગઈ છે. મુંબઈ ટ્રાફિક પોલીસ વિભાગને વોટ્સએપ પર મળેલા સંદેશમાં અભિનેતાની કારને બોમ્બથી ઉડાવવાની તેમજ તેમના ઘરમાં ઘૂસીને હત્યા કરવાની ધમકી આપવામાં આવી હતી. આ ઉપરાંત વરલી પોલીસ સ્ટેશનમાં પણ ફોન કરીને આવી જ ધમકી આપવામાં આવી હતી. બંને ઘટનાઓના આધારે પોલીસે ગુનો નોંધીને તપાસ શરૂ કરી હતી, જેમાં વડોદરાથી 26 વર્ષના યુવકની ધરપકડ કરવામાં આવી છે.
શું છે સમગ્ર મામલો?
પ્રાપ્ત માહિતી અનુસાર, વરલી પોલીસે વડોદરાથી 26 વર્ષીય યુવક મયંક પંડ્યાની ધરપકડ કરી છે. આરોપીએ વોટ્સએપ મેસેજ દ્વારા સલમાન ખાનને જાનથી મારી નાખવાની ધમકી આપી હતી. પોલીસે તેની પ્રાથમિક પૂછપરછ કરી હતી અને ત્યારબાદ નોટિસ પાઠવી મુક્ત કર્યો હતો.
સૂત્રોના જણાવ્યા અનુસાર, મયંક પંડ્યાએ મુંબઈ ટ્રાફિક પોલીસની વોટ્સએપ હેલ્પલાઈન પર સંદેશ મોકલ્યો હતો, જેમાં લખ્યું હતું:
“હું સલમાન ખાનના ઘરમાં ઘૂસીને તેમને મારી નાખીશ અને તેમની કારને બોમ્બથી ઉડાવી દઈશ.”
આ સંદેશમાં બિશ્નોઈ ગેંગનો કોઈ ઉલ્લેખ ન હતો, પરંતુ તેનો સ્વર અગાઉ મળેલી ધમકીઓ જેવો જ હોવાનું પોલીસે જણાવ્યું છે. આ આધારે વરલી પોલીસ મથકે IPC કલમ 351(2) અને 351(3) હેઠળ FIR નોંધી હતી.
Y+ સુરક્ષા છતાં ધમકી યથાવત
સલમાન ખાનને Y+ કેટેગરીની સુરક્ષા આપવામાં આવી છે, તેમ છતાં તેમની સામે ધમકીઓ મળવાનું ચાલુ જ છે.
જુલાઈ 2024માં એક વ્યક્તિએ બાઈક પર સલમાન ખાનના કાફલામાં ઘૂસવાનો પ્રયાસ કર્યો હતો.
નવેમ્બર 2024માં ટ્રાફિક પોલીસના વોટ્સએપ નંબર પર બીજું સંદેશ મળ્યું હતું જેમાં ₹5 કરોડની માંગણી સાથે માંગણી ન સંતોષાય તો ગંભીર પરિણામોની ચેતવણી આપવામાં આવી હતી.
આ ઘટનાને લઈને કર્ણાટક રાજ્યમાંથી પણ એક શખ્સની ધરપકડ કરવામાં આવી હતી.
