ગાંધીધામ ટુડે, ન્યૂઝ : કે.પી. સ્કૂલ ફોર ચિલ્ડ્રનના વિજ્ઞાન શિક્ષિકા, મીનાક્ષીબા વાઘેલાએ તાજેતરમાં વિશ્વના સૌથી ઊંચા શિખર માઉન્ટ એવરેસ્ટના બેઝ કેમ્પ સુધીની અતિ દુર્ગમ યાત્રા સફળતાપૂર્વક પૂર્ણ કરી છે. તેમની આ સિદ્ધિ માત્ર એક વ્યક્તિગત વિજય જ નથી, પરંતુ તે અદભુત ધૈર્ય, દ્રઢ સંકલ્પ અને શારીરિક સહનશક્તિનું જીવતું જાગતું ઉદાહરણ છે.
આ સિદ્ધિ પહેલાં પણ મીનાક્ષીબાએ ઘણાં મુશ્કેલ ટ્રેક પૂરા કર્યા છે, જેમાં દયારા બુગ્યાલ (13,200 ફૂટ), બુરાન ઘાટી પાસ (16,000 ફૂટ) અને ફ્રેન્ડશીપ પીક (17,000 ફૂટ) જેવા ઊંચાઈવાળા પર્વતોનો સમાવેશ થાય છે. આ દરેક ટ્રેક માટે સઘન શારીરિક અને માનસિક તૈયારીની જરૂર પડે છે, જે તેમણે સફળતાપૂર્વક કરી બતાવી છે.
શિક્ષણના ક્ષેત્રમાં સમર્પિત રહીને પણ મીનાક્ષીબાએ સાહસિક પ્રવૃત્તિઓમાં પોતાની આગવી ઓળખ ઊભી કરી છે. તેમની આ અસાધારણ સિદ્ધિઓ વિદ્યાર્થીઓ અને સાથી શિક્ષકો માટે એક મોટી પ્રેરણા છે કે સ્વપ્નોને સાકાર કરવા માટે કોઈ સીમા હોતી નથી. શાળાની ચાર દિવાલોથી બહાર પણ ઊંચા શિખરો સર કરી શકાય છે, જો મન અને જુસ્સો મજબૂત હોય.
આ સિદ્ધિ બદલ અમે મીનાક્ષીબા વાઘેલાને ખૂબ ખૂબ અભિનંદન પાઠવીએ છીએ અને ભવિષ્યની તેમની તમામ સાહસિક યાત્રાઓ માટે શુભકામનાઓ. તેમનું સાહસ અને દૃઢ નિશ્ચય અન્યો માટે પણ એક પ્રેરણા બની રહેશે.
