ગાંધીધામ ટુડે, ન્યૂઝ : ૨૦ જૂનથી ૨૯ જૂન ૨૦૨૫ દરમિયાન ૬ ગુજરાત નેવલ યુનિટ એનસીસી, ગાંધીધામ દ્વારા આહીર સમાજવાડી, ભીમાસર ખાતે સંયુક્ત વાર્ષિક તાલીમ શિબિર (CTC-506) તથા પ્રી-નૌસૈનિક શિબિર (Pre-NSC 1) નું આયોજન કરવામાં આવ્યું છે. આ પ્રશિક્ષણ શિબિર કમાન્ડર અભિજીત અભ્યંકરના દિગ્દર્શનમાં અને એનસીસી ગ્રુપ હેડક્વાર્ટર, જામનગર તથા એનસીસી ડાયરેક્ટોરેટ, અમદાવાદના માર્ગદર્શન હેઠળ યોજાશે.
આ પ્રસંગે દસથી વધુ શૈક્ષણિક સંસ્થાઓના કેડેટ્સ ભાગ લેશે. શિબિરના મુખ્ય હેતુ યુવાનોમાં શિસ્ત, નેતૃત્વ અને દેશભક્તિની ભાવના વિકસાવવી છે. આ વર્ષે આ શિબિર પ્રિ-નૌસૈનિક કેડેટ્સ માટે પણ વિશેષ રહેશે, જેમાંથી લોનાવાલામાં યોજાનાર ઓલ ઈન્ડિયા નૌસૈનિક કેમ્પ માટે પસંદગી થશે.
શિબિરમાં કુલ અંદાજિત ૭૫૨ કેડેટ્સ (પુર્વ કચ્છના ૪૮૦ તથા ગુજરાતના અન્ય ભાગોથી ૭૨) હાજર રહેશે. શિબિર દરમિયાન દરિયાઈ તાલીમ (વોટરમેનશીપ), સ્વરક્ષણ, નિષ્ણાતોના પ્રવચનો અને ઔદ્યોગિક મુલાકાતો જેવી અનેક પ્રવૃત્તિઓ યોજાશે.
વિશેષ પ્રવૃત્તિઓનું શેડ્યૂલ:
મહેમાનોના વ્યાખ્યાનો:
- ૨૧ જૂન: એસબીઆઈ – બેંકિંગ જાગૃતિ
- ૨૨ જૂન: એનડીઆરએફ – આપત્તિ પ્રતિસાદ
- ૨૩ જૂન: નાનાં શસ્ત્રો તાલીમ
- ૨૪ જૂન: અગ્નિશમન ટેક્નિક્સ
- ૨૫ જૂન: સાયબર સુરક્ષા
- ૨૬ જૂન: ડ્રગ્સ વિરોધી ઝુંબેશ
- ૨૭ જૂન: સ્વરક્ષણ તાલીમ
મુલાકાતો:
- વેલસ્પન ઇન્ડસ્ટ્રીઝ – ૨૨ જૂન
- પાર્લે ઇન્ડસ્ટ્રીઝ – ૨૩ જૂન
- વીર બાલક સ્મારક – ૨૪ જૂન
- દીનદયાળ પોર્ટ ટ્રસ્ટ – ૨૫ જૂન
વિશેષ દિન:
- ૨૧ જૂન: અંતરરાષ્ટ્રીય યોગ દિવસની ઉજવણી
આ શિબિર કેડેટ્સના વ્યક્તિત્વ વિકાસ, સામાજિક જાગૃતિ અને વ્યાવસાયિક જ્ઞાન માટે ખૂબ જ ઉપયોગી બની રહેશે. તેઓને બેંકિંગ, સુરક્ષા, આરોગ્ય, ઔદ્યોગિક વ્યવસ્થાપન અને યોગ જેવા ક્ષેત્રોમાં અનુભવ મળશે, જે તેમને જાગૃત અને જવાબદાર નાગરિક બનાવશે.
૬ ગુજરાત નેવલ યુનિટ એનસીસી, ગાંધીધામ સતત પ્રયત્નશીલ છે કે યુવાનોને દિશા, નેતૃત્વ અને દેશસેવા માટે તૈયાર કરી શકાય. આ શિબિર એનસીસીના આવા પ્રયાસો માટે એક મજબૂત પાયાની જેમ સાબિત થશે.
