ગાંધીધામ ટુડે, ન્યૂઝ : સિંધુ રિસેટલમેન્ટ કોર્પોરેશન (SRC) એ ગાંધીધામ-આદિપુર સંકુલમાં આવેલા ખાલી પ્લોટના માલિકોને તાત્કાલિક સફાઈ કરાવવા અને બાંધકામ શરૂ કરવા આદેશ આપ્યો છે. જો આ સૂચનાઓનું પાલન નહીં થાય તો લીઝ ડીડની શરતો મુજબ કડક કાર્યવાહી કરવાની અને લીઝ રદ કરવાની ચેતવણી પણ આપવામાં આવી છે.
શહેરભરમાં લીઝના મુદ્દે અજંપાભરી સ્થિતિ પ્રવર્તી રહી છે ત્યારે SRC એ જાહેર આરોગ્ય અને સ્વચ્છતાના હિતમાં આ નોટિસ બહાર પાડી છે. SRC હસ્તકના આદિપુર-ગાંધીધામ ટાઉનશીપના લગભગ ૧૪,૦૦૦ પ્લોટમાંથી ૨૦% એટલે કે આશરે ૩,૦૦૦ પ્લોટ હજુ પણ ખાલી પડ્યા છે. આ ખાલી પ્લોટમાં વધતી વનસ્પતિ, કચરાનો સંચય, મચ્છરો અને જીવાતોના ઉપદ્રવને કારણે સામાન્ય જનતામાંથી ફરિયાદો મળી રહી હતી, જે જાહેર આરોગ્ય માટે જોખમી બની ગઈ હતી.
નોટિસમાં મુખ્ય નિર્દેશો:
- તાત્કાલિક સફાઈ: ખાલી પ્લોટ ધારકોએ તાત્કાલિક તેમના પ્લોટ સાફ કરવા પડશે.
- ગેરકાયદેસર ડમ્પિંગ અટકાવવું: ગેરકાયદેસર કચરો ઠાલવવાનું અટકાવવા માટે જરૂરી પગલાં લેવા.
- બાંધકામ શરૂ કરવું: વાજબી સમય મર્યાદામાં સંબંધિત પ્લોટ પર બાંધકામ શરૂ કરીને પૂર્ણ કરવું.
કાર્યવાહીની ચેતવણી: SRC એ સ્પષ્ટ કર્યું છે કે જો આ સૂચનાઓનું પાલન કરવામાં નિષ્ફળતા જોવા મળશે, તો લીઝ ડીડની શરતો અનુસાર કોર્પોરેશન દ્વારા કાર્યવાહી કરવામાં આવશે, જેમાં લીઝ રદ કરવાનો પણ સમાવેશ થાય છે. SRCના જમીન મામલાના મેનેજરે જણાવ્યું હતું કે આ નોટિસ વિસ્તારની સ્વચ્છતા, જાહેર આરોગ્ય અને સલામતી જાળવવાના હિતમાં જારી કરવામાં આવી છે.
સમયમર્યાદાનો મુદ્દો: અગાઉ, દિનદયાળ પોર્ટ ઓથોરિટી, કંડલા દ્વારા પ્લોટના વિકાસ માટે બે વર્ષનો સમયગાળો ફાળવવામાં આવ્યો હતો, જે હવે પૂર્ણ થઈ ગયો છે. ઘણા પ્લોટ ધારકોએ બાંધકામ પૂર્ણ ન કર્યું હોવાથી સમયમર્યાદા વધારવાની માંગ કરી હતી. SRC દ્વારા આ સમયગાળાને વધુ વધારવા માટેનો પ્રસ્તાવ DPA માં મોકલાયો છે, જે હજી સુધી અનિર્ણીત છે.
SRC ના આ નિર્ણયને સ્થાનિક લોકો આવકારી રહ્યા છે, કારણ કે તેનાથી આસપાસના વિસ્તારમાં સ્વચ્છતા જળવાઈ રહેશે અને મચ્છર-જીવજંતુઓના ત્રાસમાંથી મુક્તિ મળશે.
