ગાંધીધામ ટુડે, ન્યૂઝ : કચ્છના રાષ્ટ્રીય ધોરીમાર્ગોની અત્યંત ખરાબ હાલતને લઈને પરિવહનકારો હવે આરપારની લડાઈના મૂડમાં જોવા મળી રહ્યા છે. અનેક રજૂઆતો છતાં તંત્ર દ્વારા કોઈ સકારાત્મક પ્રતિસાદ ન મળતા આગામી તારીખ ૨૫મીથી આંદોલન શરૂ કરવાની ચીમકી ઉચ્ચારવામાં આવી છે.
આ સંદર્ભે ગઈકાલે ચેમ્બર ભવન ખાતે ટ્રાન્સપોર્ટ એસોસીએશનના સભ્યોની એક મહત્વપૂર્ણ બેઠક યોજાઈ હતી, જેમાં આંદોલનના આયોજન અંગે વિસ્તૃત ચર્ચા કરવામાં આવી હતી. બેઠકમાં ઉપસ્થિત સભ્યોએ ગત તારીખ ૧૦મી એપ્રિલે કેન્દ્રીય પરિવહન મંત્રાલય અને રાષ્ટ્રીય ધોરીમાર્ગ ઓથોરિટીને પાઠવવામાં આવેલા પત્રોનો કોઈ જવાબ ન મળવા બદલ ભારે નારાજગી વ્યક્ત કરી હતી.
આ બેઠકમાં ફરી એકવાર “નો રોડ – નો ટોલ” આંદોલનની ચેતવણી આપવામાં આવી છે. એસોસીએશન દ્વારા એક સંયુક્ત નિવેદનમાં સ્પષ્ટપણે જણાવવામાં આવ્યું છે કે જો સરકાર દ્વારા તાત્કાલિક અસરકારક પગલાં લેવામાં નહીં આવે તો તારીખ ૨૫મીથી આંદોલન અમલમાં મૂકવામાં આવશે.
ચેમ્બર અને વિવિધ ટ્રાન્સપોર્ટ એસોસીએશનોના સંયુક્ત નિવેદનમાં કચ્છના ધોરીમાર્ગોની દયનીય સ્થિતિ પર ગંભીર ચિંતા વ્યક્ત કરવામાં આવી છે. ખાસ કરીને નેશનલ હાઈવે ૪૧, નેશનલ હાઈવે ૨૭ અને પોર્ટને જોડતા માર્ગોની ખરાબ હાલતને કારણે પરિવહન વ્યવસાય સાથે સંકળાયેલા લોકોને ભારે મુશ્કેલીઓનો સામનો કરવો પડી રહ્યો છે. રસ્તાઓ પરના ઊંડા ખાડાઓ, તૂટેલી સપાટી અને અધૂરી ગટરની કામગીરીના કારણે ભારે વાહનોને રોજબરોજ સમયનો વિલંબ થાય છે, કિંમતી ઇંધણનો વ્યય થાય છે અને ચાલકો તેમજ મુસાફરોનું જીવન પણ જોખમમાં મુકાય છે.
પરિવહનકારોએ વધુમાં જણાવ્યું હતું કે ખરાબ રસ્તાઓના કારણે વાહનોના ઇંધણ ખર્ચમાં ૧૫થી ૨૦ ટકાનો વધારો થયો છે, ટોલ ટેક્સમાં ગમે ત્યારે વધારો થાય છે અને ઓથોરિટી દ્વારા નિયમોનું યોગ્ય પાલન કરવામાં આવતું નથી. જેના પરિણામે વાહનોને નુકસાન થાય છે અને મેન્ટેનન્સ ખર્ચ પણ વધી રહ્યો છે. માલસામાન પહોંચાડવામાં થતા વિલંબથી વેપારીઓને નુકસાન થઈ રહ્યું છે અને અનાજ, ટેક્સટાઇલ, સિમેન્ટ, મીઠું અને અન્ય ચીજવસ્તુઓની સપ્લાય ચેઇનમાં પણ વિક્ષેપ સર્જાઈ રહ્યો છે.
આંદોલનના સ્વરૂપ અંગે માહિતી આપતા જણાવવામાં આવ્યું હતું કે મુખ્ય ધોરીમાર્ગો પર વાહનોને સ્થગિત કરવામાં આવશે, ટોલ બૂથ પર વિરોધ પ્રદર્શિત કરવામાં આવશે અને શાંતિપૂર્ણ રીતે પોતાની માંગણીઓને મજબૂતીથી રજૂ કરવામાં આવશે.
ચેમ્બર ઓફ કોમર્સ અને વિવિધ ટ્રાન્સપોર્ટ એસોસીએશનો દ્વારા જિલ્લા કલેક્ટર, પોલીસ અધિક્ષક, નેશનલ હાઈવે ઓથોરિટી અને અન્ય સંબંધિત અધિકારીઓને લેખિતમાં જાણ કરવામાં આવી છે અને રાજ્ય તેમજ કેન્દ્ર સરકારના ઉચ્ચ અધિકારીઓ પાસે તાત્કાલિક હસ્તક્ષેપની માંગ કરવામાં આવી છે. પરિવહનકારોએ તંત્ર દ્વારા તાત્કાલિક યોગ્ય કાર્યવાહી કરવામાં આવે તેવી માંગ કરી છે.
આ બેઠકમાં ગાંધીધામ ગુડ્સ ટ્રાન્સપોર્ટ એસોસીએશન, ગાંધીધામ સ્થાનિક ટ્રક ઓનર્સ એસોસીએશન, કંડલા લિક્વિડ ટાંકી ટર્મિનલ એસોસીએશન, કંડલા/મુંદરા કન્ટેનર ટ્રાન્સપોર્ટ્સ વેલ્ફેર એસોસીએશન, ન્યૂ જીજીટીએ વેલ્ફેર ફાઉન્ડેશન, કંડલા ટેન્કર ઓનર્સ એસોસીએશન, ટેન્કર ઓનર્સ એન્ડ ઓપરેશન્સ એસોસીએશનના સભ્યો અને હોદ્દેદારો તેમજ ચેમ્બરના ટ્રાન્સપોર્ટ સાથે જોડાયેલા સભ્યો મોટી સંખ્યામાં ઉપસ્થિત રહ્યા હતા.
