ગાંધીધામ ટુડે, ન્યૂઝ : નેપાળ બાદ હવે ફ્રાંસમાં પણ સરકારની નીતિઓ સામે લોકોનો ગુસ્સો ભડક્યો છે. પેરિસ સહિત ફ્રાંસના અનેક શહેરોમાં રાષ્ટ્રપતિ ઈમેન્યુઅલ મેક્રોનની સરકાર સામે લોકોએ જોરદાર વિરોધ પ્રદર્શનો કર્યા છે. આ દેખાવો દરમિયાન અનેક જગ્યાએ આગચંપી અને તોડફોડની ઘટનાઓ પણ બની, જેને પગલે પોલીસે 200થી વધુ પ્રદર્શનકારીઓની ધરપકડ કરી છે.
દેખાવકારોની મુખ્ય માંગણીઓ
પ્રદર્શનકારીઓનો મુખ્ય આરોપ છે કે મેક્રોન સરકારે સામાન્ય લોકોના જીવનસ્તરમાં સુધારો કરવા માટે કોઈ નક્કર કામગીરી કરી નથી. તેમનું કહેવું છે કે સરકારનું આર્થિક સંચાલન અત્યંત નબળું છે, જેના કારણે સામાન્ય જનતાને મુશ્કેલીઓનો સામનો કરવો પડી રહ્યો છે.
સોશિયલ મીડિયા પરથી આંદોલન શરૂ થયું
આ દેખાવોની શરૂઆત સોશિયલ મીડિયા પર ‘Block Everything’ નામના આહ્વાનથી થઈ હતી. આ અપીલને પગલે મોટી સંખ્યામાં લોકો રસ્તા પર ઉતરી આવ્યા હતા. પેરિસ સહિતના ઘણાં શહેરોમાં પ્રદર્શનકારીઓએ ટ્રાફિક જામ કરી દીધો હતો અને કચરાપેટીઓને આગ ચાંપી હતી. પ્રદર્શનકારીઓ અને પોલીસ વચ્ચે અનેક સ્થળોએ ઘર્ષણ પણ થયું હતું.
પોલીસનો સખત બંદોબસ્ત
હજારોની સંખ્યામાં પોલીસકર્મીઓ તૈનાત હોવા છતાં, પ્રદર્શનકારીઓને કાબૂમાં લેવું મુશ્કેલ બન્યું હતું. પોલીસે પરિસ્થિતિને નિયંત્રિત કરવા માટે બળપ્રયોગ પણ કર્યો, જેના પરિણામે અનેક લોકોની ધરપકડ થઈ છે. હાલમાં ફ્રાંસમાં સ્થિતિ તંગ છે અને સરકાર પ્રદર્શનકારીઓને શાંત પાડવા માટેના પ્રયાસો કરી રહી છે.
