ગાંધીધામ ટુડે, ન્યૂઝ : ગાંધીધામના એક યુવાન સાથે RTO ટ્રાફિક ચલણના નામે સાયબર ઠગાઈનો મોટો બનાવ સામે આવ્યો છે. અંજારની ચિત્રકૂટ સોસાયટીમાં રહેતા અને આદિપુર તથા ગાંધીધામમાં પૂજાપા ભંડાર ચલાવતા ભાર્ગવ જીતેન્દ્ર રાવલ નામના યુવાનના બે બેંક ખાતામાંથી કુલ ₹10,81,525 બારોબાર ઉપાડી લેવાયા હતા. આ ઘટના 12 જુલાઈ, 2025ના રોજ બની હતી.
કેવી રીતે થઈ છેતરપિંડી?
ફરિયાદી ભાર્ગવ રાવલ પોતાની ગાંધીધામની દુકાને હતા ત્યારે તેમને એક અજાણ્યા નંબર પરથી વોટ્સએપ પર “RTO ટ્રાફિક ચલણ 500 APK” નામની એક ફાઇલ મળી હતી. આ ફાઇલમાં ભારત સરકારના RTOનો લોગો જોઈને તેમને તે સાચી લાગી હતી. તેમણે આ APK ફાઇલ પોતાના મોબાઇલમાં ડાઉનલોડ કરી અને તેમાં નોંધણી માટે આધારકાર્ડ નંબર, મોબાઈલ નંબર, બેંક ખાતાની માહિતી, નેટ બેંકિંગ ID અને પાસવર્ડ જેવી અંગત વિગતો દાખલ કરી હતી.
વિગતો દાખલ કર્યા બાદ તેમનો મોબાઇલ સતત લોડિંગ બતાવતો રહ્યો, અને તેમને ખ્યાલ આવ્યો કે તેમનો ફોન હેક થઈ ગયો છે. ઠગ ટોળકીએ આ યુવાનના બે જુદા-જુદા બેંક ખાતામાંથી અલગ-અલગ ટ્રાન્ઝેક્શન દ્વારા કુલ ₹10,81,525 ઉપાડી લીધા હતા. પૈસા ઉપાડવાના મેસેજ આવતા જ ભાર્ગવ રાવલ સ્તબ્ધ થઈ ગયા હતા.
તાત્કાલિક પગલાં અને સાયબર પોલીસની અપીલ
આ ઘટના બનતા જ ભાર્ગવ રાવલે તાત્કાલિક 1930 પર ફોન કરીને પોતાની ફરિયાદ નોંધાવી હતી. જોકે, તેમને તેમના પૈસા પરત ન મળતા, તેમણે આ અંગે પોલીસ ફરિયાદ નોંધાવી છે.
સાયબર ક્રાઈમ પોલીસે આ ઘટના અંગે લોકોને સચેત રહેવાની અપીલ કરી છે. હાલમાં ઠગબાજ ટોળકી RTO ચલણના નામે આવી APK ફાઇલો મોકલીને લોકોના ખાતામાંથી પૈસા ઉસેડી રહી છે. તેથી, સાયબર પોલીસે લોકોને અજાણ્યા નંબર પરથી આવતી કોઈ પણ શંકાસ્પદ લિંક કે ફાઇલ ડાઉનલોડ ન કરવા કે ખોલવા વિનંતી કરી છે.
સાયબર ઠગાઈથી બચવા શું કરવું?
- અજાણ્યા નંબર પરથી આવતી કોઈ પણ લિંક કે APK ફાઇલ પર ક્લિક ન કરો.
- કોઈપણ એપ્લિકેશન ડાઉનલોડ કરતા પહેલા તેની વિશ્વસનીયતા ચકાસો.
- કોઈપણ સરકારી વિભાગ કે બેંકના નામે આવતા શંકાસ્પદ મેસેજ કે ફોન કોલથી સાવધાન રહો.
- તમારી બેંક ખાતાની માહિતી, OTP, નેટ બેંકિંગ ID કે પાસવર્ડ કોઈની સાથે શેર ન કરો.
- જો તમને કોઈ સાયબર છેતરપિંડીનો ભોગ બન્યા હોવાનું જણાય, તો તાત્કાલિક 1930 પર ફરિયાદ નોંધાવો અને બેંકનો સંપર્ક કરો.
આ પ્રકારની છેતરપિંડીથી બચવા માટે સાયબર સુરક્ષા અંગે જાગૃત રહેવું અત્યંત જરૂરી છે.
પૂર્વ કચ્છ પોલીસનો સાયબર ફ્રોડ સામે “જનતા જોગ સંદેશ”
પૂર્વ કચ્છ, ગાંધીધામમાં વધી રહેલા સાયબર ક્રાઈમ અને ફ્રોડને રોકવા માટે સાયબર ક્રાઈમ પોલીસ સ્ટેશન દ્વારા “જનતા જોગ સંદેશ” જાહેર કરાયો છે. પોલીસ મહાનિરીક્ષક શ્રી ચિરાગ કોરડીયા અને પોલીસ અધિક્ષક શ્રી સાગર બાગમારના માર્ગદર્શન હેઠળ લોકજાગૃતિ અભિયાન ચાલી રહ્યું છે. તાજેતરમાં, ખોટા ઈ-ચલણના નામે છેતરપિંડીના કિસ્સાઓ વધ્યા છે, જેમાં ગુનેગારો SMS, WhatsApp કે ઈમેલ દ્વારા RTO E-CHALLAN ને લગતી નકલી .apk ફાઈલો મોકલી વ્યક્તિગત ડેટા ચોરી રહ્યા છે.
આવા ફ્રોડથી બચવા માટે, નાગરિકોને RTO Challan.apk કે RTO Challan250.apk જેવી શંકાસ્પદ લિંક્સ પર ક્લિક ન કરવા અને અજાણ્યા સ્ત્રોતોમાંથી એપ્લિકેશન ડાઉનલોડ ન કરવા સખતપણે સલાહ આપવામાં આવે છે. હંમેશા સત્તાવાર વેબસાઈટ્સ જેમ કે echallan.parivahan.gov.in નો ઉપયોગ ચલણ તપાસવા કે ભરવા માટે કરો. ગુગલ પ્લેસ્ટોરમાં ગુગલ પ્લે પ્રોટેક્ટ ઓન રાખવા અને કવચ 2.0 એપ્લિકેશન ઇન્સ્ટોલ કરવાથી માલવેર ફાઈલોને બ્લોક કરવામાં મદદ મળશે. કોઈપણ સાયબર ફ્રોડના કિસ્સામાં, તાત્કાલિક સાયબર હેલ્પલાઈન નંબર 1930 પર અથવા National Cybercrime Reporting Portal www.cybercrime.gov.in પર જાણ કરો.
